„რესპუბლიკურ საავადმყოფოს დაანგრევენ, ახალ საავადმყოფოს ააშენებენ, გამონთავისუფლებულ უზარმაზარ ტერიტორიაზე კორპუსებს ჩადგამენ! – ზუსტად ამას ვამბობდი ერთი თვის წინ, რაც გაამჟღავნა კიდევაც დღეს კობახიძემ – რესპუბლიკური საავადმყოფოს ადგილზე ახალს ჩავდგამთ და დანარჩენ ტერიტორიას გავყიდითო.

პროტესტმა ის შედეგი გამოიღო, რომ ჯერ კი არ დაანგრევენ, არამედ ჯერ ააშენებენ მის უკანა, მცირე ნაწილში და მერე ამ უზარმაზარ ტერიტორიაზე (წინა და უკანა ეზოსთან ერთად) კორპუსებს ჩადგამენ.

დანაშაულია, რასაც სჩადიან. რესტორან „არაგვის“ ტერიტორიიდან დაწყებული, „ლაგუნას“, აბრეშუმის ფაბრიკის ტერიტორიის, საზოგადოებრივი მაუწყებლის გასხვისებული შენობის, ახლა ამას დამატებული რესპუბლიკური საავადმყოფოს ტერიტორია – ამ მოკლე მანძილზე ცათამბჯენების ბეტონის ჯუნგლებად აქცევენ ქალაქს. სატრანსპორტო კოლაფსი რომ გარდაუვალია, ამაზე არც დარდობენ. ასეულ მილიონობით ფული დაილექება „ოცნებასთან“ დაკავშირებულ ბიზნესებში და პარტიულ ყულაბაში“, – წერს პარლამენტის წევრი რომან გოცირიძე სოციალურ ქსელში.

მივიღეთ შემდეგი გადაწყვეტილება – უახლოეს თვეების განმავლობაში მთავრობა, ჯანდაცვის სამინისტრო იმუშავებს რესპუბლიკურ საავადმყოფოსთან დაკავშირებით ალტერნატიულ პროექტზე, – განაცხადა 24 თებერვალს საქართველოს პრემიერ-მინისტრმა ირაკლი კობახიძემ რესპუბლიკური საავადმყოფოს მედპერსონალთან შეხვედრის შემდეგ, მთავრობის ადმინისტრაციაში გამართულ ბრიფინგზე.

როგორც პრემიერმა აღნიშნა, გაჩერდება დაწყებული პროცესი, რომელიც უკავშირდებოდა რეორგანიზაციას.

„ჩვენ გუშინ მოვისმინეთ ექიმების მოსაზრებები, ამის შემდეგ გვქონდა კონსულტაციები ჯანდაცვის მინისტრთან, ჯანდაცვის სამინისტროს წარმომადგენლებთან ერთად და მივიღეთ შემდეგი გადაწყვეტილება – უახლოეს თვეების განმავლობაში მთავრობა, ჯანდაცვის სამინისტრო იმუშავებს ალტერნატიულ პროექტზე. ალტერნატიული ვარიანტი შემოგვთავაზეს ექიმებმა, რაც გულისხმობდა იმას, რომ უკანა ტერიტორიაზე შეიძლებოდა საავადმყოფოს მშენებლობა, ხოლო წინა ტერიტორიის გამოყენება მოგვიანებით საინვესტიციო მიზნებისთვის. ეს შემოთავაზება შეესაბამება იმ გეგმას, რომელიც თავის დროზე, თუ არ ვცდები, 2007 წელს. თავის დროზე, ბატონ ბიძინა ივანიშვილს ჰქონდა დაგეგმილი ახალი შენობის მშენებლობა. შემდეგ ასევე პოლიტიკური მიზეზების გამო, პროცესების გათვალისწინებით, სამწუხაროდ, ეს პროექტი ვეღარ განხორციელდა. სწორედ უკანა ტერიტორიაზე იგეგმებოდა ახალი საავადმყოფოს მშენებლობა. ჩვენ ვიმუშავებთ სწორედ ასეთ პროექტზე, კიდევ ერთხელ წარიმართება საპროექტო სამუშაოები, დაიგეგმება შესაბამისი პროცესი და მომზადდება წინადადებები სწორედ ამ მიმართულებით, რომ უკანა ტერიტორიაზე განხორციელდეს საავადმყოფოს მშენებლობა, ხოლო წინა ტერიტორია გამოყენებული იქნას საინვესტიციო მიზნებისთვის, რაც ზუსტად შეესაბამება იმ შემოთავაზებას, რომელიც ჰქონდათ რესპუბლიკური საავადმყოფოს ექიმებს. შესაბამისად, მივიღეთ გადაწყვეტილება, რომ გაჩერდება დაწყებული პროცესი, რომელიც უკავშირდებოდა ექიმების და პერსონალის მიერ განცხადებების დაწერას, რეორგანიზაციას. ჩვენ მოვამზადებთ უახლოესი თვეების განმავლობაში წინადადებებს და ამის შემდეგ განისაზღვრება ის, თუ როგორ გაგრძელდება პროცესი“, – განაცხადა ირაკლი კობახიძემ.