GUARDIANGE – უკრაინის მოსახლეობა 10 მილიონით შემცირდა, ანუ დაახლოებით მეოთხედით, მას შემდეგ, რაც რუსეთის სრულმასშტაბიანი შეჭრა დაიწყო, რაც განაპირობა ლტოლვილების ქვეყნიდან წასვლამ, შობადობის შემცირებამ და ომის შედეგად მოქალაქეთა დაღუპვამ, – განაცხადა გაეროს წარმომადგენელმა ფლორენს ბაუერმა ჟენევაში გამართულ პრესკონფერენციაზე.

როგორც გაეროს მოსახლეობის ფონდის აღმოსავლეთ ევროპის ხელმძღვანელმა ფლორენს ბაუერმა თქვა, 2022 წლის თებერვალში რუსეთის უკრაინაში შეჭრამ ისედაც რთული დემოგრაფიული მდგომარეობა უფრო მძიმე გახადა.

„დაბადების მაჩვენებელი მკვეთრად შემცირდა და ამჟამად ერთ ქალზე დაახლოებით ერთი ბავშვი მოდის, რაც მსოფლიოში ერთ-ერთი ყველაზე დაბალია“, – თქვა მან. მოსახლეობის სტაბილურობის შესანარჩუნებლად საჭიროა ქალზე 2.1 ბავშვის შობადობის დონე.

უკრაინამ, რომელსაც 1991 წელს, საბჭოთა კავშირის დაშლის დროს, 50 მილიონზე მეტი მოსახლეობა ჰყავდა, თითქმის აღმოსავლეთ ევროპისა და ცენტრალური აზიის მეზობელი სახელმწიფოების მსგავსად, მოსახლეობის სერიოზული კლება განიცადა. 2021 წელს, რუსეთის სრულმასშტაბიანი შეჭრის წინა წელს, მისი მოსახლეობა დაახლოებით 40 მილიონი იყო.

ბაუერმა თქვა, რომ უკრაინის მოსახლეობაზე ომის გავლენის ზუსტი მაჩვენებლის დასადგენად უნდა დაველოდოთ კონფლიქტის დასრულებას, როდესაც საბოლოოდ იქნება შესაძლებელი სრული აღწერის ჩატარება.