პეკინში სამუშაო ვიზიტის ფარგლებში ლევან დავითაშვილი ჩინეთის სახალხო ბანკის წარმომადგენლებს შეხვდა, სადაც ორ ქვეყანას შორის ფინანსურ სექტორში თანამშრომლობის მნიშვნელოვანი საკითხები განიხილეს.
როგორც შეხვედრაზე ითქვა, უნდა გაძლიერდეს საქართველოს ეროვნულ ბანკსა და ჩინეთის სახალხო ბანკს შორის თანამშრომლობა და გამოცდილების გაზიარება ძირითად სფეროებში, მათ შორის მონეტარული პოლიტიკის განხორციელებისა და გონივრული ზედამხედველობის კუთხით.
ლევან დავითაშვილის განცხადებით, საქართველოს ეროვნული ბანკი ამჟამად მუშაობს საქართველოში გადახდის ინფრასტრუქტურის მოდერნიზებაზე, რაც მოიცავს მყისიერი გადახდის სისტემის (IPS) განვითარებას, რათა ის უფრო სწრაფი და ეფექტური გახდეს. პირველი ვიცე-პრემიერის შეფასებით, ეს წაახალისებს სავაჭრო-ეკონომიკურ ურთიერთობებს. მისი თქმით, გადახდის სერვისებზე ორმხრივი და რეგიონული თანამშრომლობა ასევე მნიშვნელოვანია უსაფრთხო, ეფექტური, ხელმისაწვდომი და თავსებადი საერთაშორისო გადახდის ქსელის განვითარებისთვის.
მინისტრის ინფორმაციით, მხარეებმა იმსჯელეს საქართველოს ეროვნულ ბანკსა და ჩინეთის სახალხო ბანკს შორის ურთიერთგაგების მემორანდუმის გაფორმებაზე, რომელიც უზრუნველყოფს პარტნიორობის ფორმალიზებას და სამომავლო თანამშრომლობის ყოვლისმომცველ ჩარჩოს.
შეხვედრაზე ასევე განიხილეს საქართველოს ეროვნული ბანკის თანამშრომლობის გაძლიერების პერსპექტივები რეგიონის ქვეყნებთან ფინანსური ტექნოლოგიების განვითარების მიმართულებით. საუბარი შეეხო დაფინანსების ალტერნატიული საშუალებების გაჩენას, მათ შორის იუანში დენომინირებულ ფასიან ქაღალდებში ინვესტირების შესაძლებლობებს, ასევე სახელმწიფო ობლიგაცებზე წვდომას ქართული საფინანსო სექტორისა და საქართველოს ეკონომიკური აგენტებისთვის.
„ჩვენი სტრატეგიის მიზანია მხარი დავუჭიროთ ფინტექის განვითარებას შუა დერეფანში რეალური ეკონომიკის პოზიტიური ტენდენციების კაპიტალიზაციის გზით“ – აღნიშნა ლევან დავითაშვილმა.
ინფორმაციას საქართველოს ეკონომიკისა და მდგრადი განვითარების სამინისტრო ავრცელებს.