GUARDIANGE – „ჰამასმა“ განაცხადა, რომ მისი ლიდერი ისმაილ ჰანიე თეირანში საკუთარ სახლში ისრაელის თავდასხმის შედეგად დაიღუპა. ჰანიე თეირანში ირანის პრეზიდენტის, მასუდ ფეზეშქიანის ინაუგურაციაზე დასასწრებად იმყოფებოდა.

ირანის რევოლუციურ გუშაგთა განცხადებით, თავდასხმის შედეგად ჰანიეს ერთ-ერთი პირადი მცველიც დაიღუპა.

ისრაელს ჯერ განცხადება არ გაუვრცელებია, მაგრამ მანამდე პირობა დადო, რომ „გაანადგურებდა“ პალესტინის ჯგუფს 2023 წლის 7 ოქტომბრის თავდასხმის შემდეგ, რომლის დროსაც 1200 ისრაელელი დაიღუპა. ჰანიეს სიკვდილამდე რამდენიმე საათით ადრე ისრაელმა განაცხადა, რომ ლიბანის დედაქალაქ ბეირუთში თავდასხმის დროს „ჰეზბოლას“ მაღალჩინოსანი მოკლა.

ბოლო 24 საათის განმავლობაში, ირანის მიერ მხარდაჭერილ ორ მაღალჩინოსან მებრძოლ ლიდერზე თავდასხმებმა გააჩინა შიშები, რომ რეგიონი მალე შეიძლება შემდგომი კონფლიქტის მიზეზი გახდეს.

ამერიკის შეერთებული შტატების თავდაცვის მდივანმა ლოიდ ოსტინმა ახლახან გაიმეორა, რომ არ მიიჩნევს, რომ ახლო აღმოსავლეთში უფრო ფართო კონფლიქტი „გარდაუვალია“.

„არ მგონია, რომ ომი გარდაუვალია. მე ვფიქრობ, რომ დიპლომატიისთვის ყოველთვის არის ადგილი და შესაძლებლობები“, – უთხრა ოსტინმა მედიას ფილიპინებში მოგზაურობის ბოლო დღეს.

ირანში „ჰამასის“ პოლიტიკური ლიდერის, ისმაილ ჰანიეს მკვლელობას რუსეთი და თურქეთი გმობენ.

ჰანიეს მკვლელობას „სრულად მიუღებელ პოლიტიკურ მკვლელობას“ უწოდებს რუსეთის საგარეო საქმეთა სამინისტრო. ქვეყნის საგარეო საქმეთა მინისტრის მოადგილემ, მიხაილ ბოგდანოვმა განაცხადა, რომ „ჰამასის“ ლიდერის მკვლელობა „დაძაბულობის შემდგომ ესკალაციას გამოიწვევს“.

თურქეთის საგარეო საქმეთა სამინისტრომაც, ასევე დაგმო „თეირანში განხორციელებული სამარცხვინო მკვლელობა“.

ანკარაში აცხადებენ, რომ „ეს თავდასხმა ასევე მიზნად ისახავს ღაზის ომის რეგიონის მასშტაბით გავრცელებას.“