GUARDIANGE – აშშ-ის პრეზიდენტი ჯო ბაიდენი მიესალმა ნატოს ლიდერებს ვაშინგტონში ძლიერი გამოსვლით, რომელიც თითქოსდა დაარწმუნებდა მოკავშირეებს საზღვარგარეთ და შინ, რომ მას შეუძლია გაუმკლავდეს დონალდ ტრამპთან საარჩევნო გამოწვევას.

როგორც BBC იტყობინება, სამიტის გახსნაზე მოკლე, მაგრამ ძლიერი გამოსვლისას პრეზიდენტმა აღნიშნა, რომ სამხედრო ალიანსი „უფრო ძლიერია, ვიდრე ოდესმე“, მაშინ, როცა ის „გადამწყვეტი მომენტის“ წინაშე აღმოჩნდა რუსეთსა და უკრაინას შორის ომის დროს. გაფრთხილების ფონზე, რომ „ავტოკრატებმა“ დაარღვიეს გლობალური წესრიგი“, ბაიდენმა კიევისთვის მეტი სამხედრო დახმარების შესახებ გამოაცხადა.

აშშ-ის პრეზიდენტი და გერმანიის, იტალიის, ნიდერლანდებისა და რუმინეთის ლიდერები უკრაინას საჰაერო თავდაცვის გასაძლიერებლად „პატრიოტის“ სარაკეტო ბატარეებს და სხვა სისტემებს ჩუქნიან.

„ომი დასრულდება იმით, რომ უკრაინა დარჩება თავისუფალი და დამოუკიდებელი ქვეყანა. რუსეთი ვერ გაიმარჯვებს. უკრაინა გაიმარჯვებს“, – განაცხადა ბაიდენმა.

როგორც BBC წერს, ბაიდენმა დაახლოებით 13 წუთის განმავლობაში ისაუბრა მკაფიო ხმით, რაც მკვეთრად განსხვავდება გასულ თვეს მისი ტრამპთან საპრეზიდენტო დებატების დროს დაბნეული და სუსტი ტონისაგან.

პარალელურად, კონგრესის „დემოკრატებმა“ ბაიდენის პარტიის ხელმძღვანელობის საკითხების განსხილველად კერძო შეხვედრა გამართეს, და განწყობა „სევდიანი“ იყო. ამის შესახებ კანონმდებლებმა საინფორმაციო სააგენტო Associated Press-ს განუცხადეს.

მოგვიანებით, 9 ივლისს, წარმომადგენელთა პალატის მეშვიდე „დემოკრატმა“ – მიკი შერილმა ნიუ ჯერსიდან – საჯაროდ მოუწოდა ბაიდენს არ მიიღოს მონაწილეობა ხელახლა არჩევნებში და თქვა, რომ რისკი „მეტისმეტად მაღალია“.

გავრცელებული ინფორმაციით, სტუმრად მყოფმა დიპლომატებმა ასევე გამოხატეს სკეპტიციზმი ბაიდენის მომავლის მიმართ.

„ჩვენ ვერ ვხედავთ, როგორ შეიძლება ის დაბრუნდეს დებატების შემდეგ“, განუცხადა ერთ-ერთმა ევროპელმა დიპლომატმა სააგენტო Reuters-ს. „ვერ წარმომიდგენია იგი აშშ-სა და ნატოს სათავეში კიდევ მომავალი ოთხი წლის განმავლობაში“.

ბაიდენის გუნდი კი ამის საპასუხოდ ცდილობს აჩვენოს, რომ 81 წლის პრეზიდენტი საკმარისად ძლიერია იმისათვის, რომ თავისი უფლებამოსილება შეასრულოს და გამოწვევებს გაუმკლავდეს.

თავად ბაიდენმაც არაერთხელ განაცხადა, რომ არ აპირებს საკუთარი კანდიდატურის მოხსნას და 2024 წლის 5 ნოემბრის საპრეზიდენტო არჩევნებში „დემოკრატიული პარტიის“ სახელით თავად იყრის კენჭს.